Футбол бўйича Жаҳон чемпионатининг асл кубоги Тошкентга олиб келинди

26-январ маҳаллий вақт билан соат 9:46 да Titan Airways авиакомпаниясининг Олмаотадан амалга оширилган чартер рейси Тошкент халқаро аэропортига қўнди. Бу ҳақда Uzbekistan Airports хабар берди.

Coca-Cola томонидан тақдим этилаётган FIFA World Cup Trophy Tour доирасида «The Original Trophy Is Here» деган имзога эга Airbus A320-233 самолёт FIFA Жаҳон чемпионатининг асл кубогини Тошкентга олиб келди.

Тўлиқ соф олтиндан ясалган ушбу кубок 6 килограммдан ошиқроқ оғирликда бўлиб, 1974-йилда яратилган. Кубок билан бирга футбол афсонаси, 2006 йилги жаҳон чемпиони Марко Матераззи ҳам Ўзбекистонга келди.

Тошкент ушбу глобал маршрутдаги асосий бекатлардан бири ҳисобланади. Ушбу тур Ўзбекистон миллий терма жамоасининг тарихий ютуғи — мамлакатнинг илк бор FIFA Жаҳон чемпионати 2026 мусобақасига йўл олгани муносабати билан алоҳида аҳамият касб этмоқда. Тадбир Ўзбекистон Футбол Ассоциацияси кўмагида ташкил этилмоқда ва минглаб мухлислар учун эсда қоларли воқеага айланиши кутилмоқда. Минглаб футбол мухлислар кубокни шахсан кўриш имкониятига эга бўлишади.

Маълумот учун: илк марта 2018-йилда Жаҳон чемпионати кубоги Тошкентга олиб келинган эди.

Расмий саёҳат 3 январ куни Саудия Арабистонида бошланган бўлиб, жами 75 та манзилни қамраб олиши режалаштирилган. Шу пайтгача самолёт Вена, Сеул, Токио, Ня Транг ва Куала-Лумпур каби Европа ва Осиёнинг ўнлаб шаҳарларига ташриф буюрди. Тур 2026-йил 11-июндан 19-июлга қадар бўлиб ўтадиган Жаҳон чемпионати бошланишигача давом этади.

Кубок ҳақида

Тўлиқ олтиндан тайёрланган Жаҳон чемпионати кубоги 6,175 килограмм вазнга эга бўлиб, у 1974 йилда яратилган. Унинг дизайнида Ер шарини баланд кўтариб турган икки инсон қиёфаси ифодаланган. Асл трофейни ушлаш фақатгина чекланган инсонларга рухсат этилган: собиқ жаҳон чемпионлари, айрим давлат раҳбарлари ҳамда ФИФА Президенти бу ҳуқуққа эга.

Жаҳон чемпионати ғолибларига топшириладиган ушбу кубок доимий равишда ФИФА мулки ҳисобланади. Мусобақа якунлангач, ғолиб жамоага расмий маросимда асл кубок тақдим этилади, кейин эса унга олтин қоплама билан безатилган махсус нусха берилади.