Хитойнинг йирик компанияси Самарқандда 500 млн долларлик қоғоз заводи қуради
Маълум қилинишича, ушбу лойиҳа минглаб иш ўринлари яратиши кутилмоқда. У Марказий Осиёдаги илк йирик қоғоз ишлаб чиқариш корхоналаридан бири бўлади.
Хитойнинг «Huanrong Paper Company» компанияси Самарқанд вилоятида замонавий қоғоз ва картон ишлаб чиқариш заводи қуришни режалаштирмоқда. Лойиҳанинг умумий қиймати тахминан 500 млн долларга баҳоланмоқда. Вилоят ҳокимлиги маълумотига кўра, ушбу корхона Марказий Осиё миқёсида илк шундай йирик ишлаб чиқариш мажмуаларидан бири бўлиши мумкин.
Лойиҳа музокаралари
Ўтган ҳафта охирида компания раҳбарияти Самарқанд вилояти ҳокими Азиз Бобоев билан учрашиб, лойиҳа тафсилотларини муҳокама қилди. Тақдим этилган режага кўра, корхонада саноат картони, ўрама маҳсулотлари ҳамда офис қоғозлари ишлаб чиқарилади. Мажмуа замонавий технологиялар асосида қурилиши режалаштирилган.
Жойлашув ва амалга ошириш босқичлари
Заводни жойлаштириш учун 50 гектардан ортиқ ер майдони талаб этилади. Компания ҳудуд сифатида «Urgut» эркин иқтисодий зонасига қарашли «Xishrav-2» массивини кўриб чиқмоқда. Лойиҳани беш босқичда амалга ошириш режалаштирилган.
Иш ўринлари ва бюджет тушумлари
Қайд этилишича, қуриладиган корхона тўлиқ қувват билан ишга тушгач, тахминан 3 мингта янги иш ўрни яратилади. Шунингдек, давлат бюджетига йиллик 50–60 млн доллар миқдорида солиқ тушумлари келиб тушиши кутилмоқда.
Инвесторларни қўллаб-қувватлаш
Вилоят ҳокими хитойлик инвесторларга ташкилий ва инфратузилмавий масалаларда ҳар томонлама ёрдам кўрсатилишини таъкидлади. Қайд этилишича, ҳозирда Ўзбекистонда хитойлик инвесторлар иштирокида 5 мингдан ортиқ корхона фаолият юритмоқда ва уларнинг сони изчил ўсиб бормоқда.
