Россия урушга 128 давлат аҳолисини жалб қилди: Алдов ва тузоқлар тафсилоти

Россия ҳукумати Украинага қарши урушга хорижликларни жалб қилиш учун сохта кадрлар агентликлари ва яширин миграция тармоқларидан фойдаланмоқда.

The Telegraph наширининг ёзишича, ёлланганларнинг кўпчилиги урушга тайёргарликнинг йўқлиги ва қаерга тушиб қолганини тушунмагани сабабли фронтга юборилганидан кейин дастлабки 72 соат ичида ҳалок бўлмоқда.

Маълумотларга кўра, 2025 йил охирига келиб Россия Африка, Осиё ва Лотин Америкасининг 128 давлатидан 18 мингга яқин одамни урушга юборган, уларнинг камида 3300 нафари жангларда ўлдирилган.

Сохта ваъдалар ва ёллаш схемалари

Украинада асирга тушган 10 минг нафар россиялик ҳарбийларнинг 7 фоизини хорижликлар ташкил этади. Асирларнинг кўпчилиги уларга дастлаб фронт ортида тинч ишлар ваъда қилинганини, бироқ Россияга келишлари билан паспортлари олиб қўйилиб, рус тилидаги тушунарсиз ҳужжатларга мажбурлаб имзо чектирилганини айтишмоқда.

Масалан, камерунлик бир киши интернетдаги қоровул ёки ошпазлик ҳақидаги эълонга ишониб урушга тушиб қолган бўлса, 43 ёшли угандалик фуқаро фаррош ёки қўриқчи бўлиб ишлаш илинжида қарз олиб, Россияга келган ва келиши билан қурол билан қўрқитилиб, фронтга ҳайдалган.

Франция халқаро алоқалар институти тадқиқотларига кўра, Россиялик ёлловчиларнинг услублари кўп жиҳатдан одам савдоси схемаларига ва Жануби-Шарқий Осиёдаги фирибгарлик марказларига ўхшаб кетади. Африкада бу мақсадларда илгари ноқонуний миграцияни ташкил этган воситачилар ва Россия билан алоқаси бор маҳаллий аҳоли ишга солинган бўлиб, ёллаш ишлари кўпинча жойлардаги агентлар орқали амалга оширилмоқда.

Тадқиқотчи Терри Виркулоннинг тушунтиришича, Россия мигрантлар энг кўп келадиган давлатларни яхши билади ва шунчаки мавжуд тармоқлар, ҳаттоки сайёҳлик агентликлар хизматидан фойдаланади. Шунингдек, Мали ва Марказий Африка Республикасидаги «Вагнер» гуруҳи бўлинмалари ҳам бу жараёнда фаол қатнашган бўлиб, чет элликларнинг аксарияти ўз ватанидаги камбағаллик ва чорасизлик сабабли тузоққа туширилган.

Фронтдаги шафқатсизлик

Фронт чизиғида африкалик жангчилар тобора кўп учрамоқда ва дронлар орқали олинган видеоларда уларга нисбатан шафқатсиз муносабат акс этган. Масалан, январ ойи бошида тарқалган бир видеода кўкрагига мина боғланган қора танли ёлланма ишчига қурол билан таҳдид қилиниб, «тирик бомба» сифатида ўлим зонасига югуришга буйруқ берилган бўлса, бошқа бир видеода янги келган африкаликларни очиқчасига «сарфланадиган материал» деб аташган.

Шу сабабли ЖАР ва Кения каби давлатлар ўз фуқароларини бундай фирибгарликдан огоҳлантирмоқда ва ҳозирда камида тўртта мамлакат Россиядан ўз фуқароларини қайтаришни расман талаб қилмоқда.