12 та компания устун музокара кучига эга деб топилди

Рақобат қўмитаси устун музокара кучига эга компаниялар рўйхатини кенгайтириб, унга яна 12 та хўжалик юритувчи субектни киритди. Қўмита маълумотига кўра, мазкур компаниялар маиший чиқиндиларни йиғиш ва олиб чиқиб кетиш ҳамда темир йўл линияларидан фойдаланиш хизматлари бозорида фаолият юритади.

Рўйхатга киритилган корхоналар

Рўйхатга киритилган компанияларнинг бир қисми Тошкент вилоятида маиший чиқиндиларни йиғиш ва олиб чиқиб кетиш хизматларини кўрсатади. Жумладан, «Zangiota Obodon» МЧЖ, «Rahnamo Servis» МЧЖ ҳамда «Angren Bunyod Fayz» МЧЖ ушбу ҳудудда фаолият олиб боради. Ушбу корхоналар хизмат кўрсатаётган ҳудуд ва бозор шароитида битим шартларига таъсир кўрсатиш имкониятига эга деб топилган.

Фарғона вилоятида эса «Maxsus Garant Avto Servis» МЧЖ ҳамда «Vodiy Maxsus Sanitar Trans» МЧЖ маиший чиқиндиларни йиғиш ва ташиш хизматлари бўйича устун музокара кучига эга компаниялар сифатида қайд этилди. Қўмита баҳосига кўра, мазкур субъектлар ўз сегментида сезиларли бозор таъсирига эга.

Сурхондарё вилоятида ушбу рўйхатга киритилган компаниялар сони кўпчиликни ташкил этди. Хусусан, «Surxondaryo viloyati Toza Hudud» давлат муассасаси, «Bio Texno Eko» МЧЖ, «Bio-Tex-Eko» МЧЖ, «Qiziriq-Invest» МЧЖ ҳамда «Sale Kingdom» МЧЖ маиший чиқиндилар билан боғлиқ хизматларда устун музокара кучига эга деб топилди.

Шунингдек, темир йўл линияларидан фойдаланиш хизматлари бўйича «Petromaruz Uzbekistan» МЧЖ ва «Ulug‘bek Yangiyer Qurilish» МЧЖ ҳам мазкур мақомга эга бўлди.

Устун музокара кучига эга компаниялар рўйхати билан бу ерда танишишингиз мумкин.

Маълумот учун: «Рақобат тўғрисида»ги Қонуннинг 14-моддасига кўра, устун мавқега эга бўлмаган хўжалик юритувчи субект ёки шахслар гуруҳи томонидан битим шартлари, товарлар сотиладиган ҳудуд ёки нархга бир томонлама таъсир кўрсатиш имконияти мавжуд бўлса, бундай ҳолат устун музокара кучи деб эътироф этилади.