«Škoda Group» Ўзбекистонга яна поезд сотмоқчи — бу сафар ЕИ кўмагида
Ўзбекистон темир йўллари ва Чехиянинг «Škoda Group» компанияси ўртасидаги 320 миллион евролик тўхтаб қолган лойиҳа қайта жонланиши кутилмоқда.
Чехиянинг «Škoda Group» компанияси Ўзбекистонда йирик темир йўл шартномаси бўйича музокаралар олиб бормоқда. Бу ҳақда компания матбуот хизмати маълум қилди.
Тўхтаб қолган шартнома ва янги музокаралар
2023 йилда компания «Ўзбекистон темир йўллари» АЖ билан қиймати 320 млн еврога тенг 30 та электропоезд етказиб бериш бўйича шартнома имзолаган эди. Режага кўра, ишлаб чиқариш жараёни 2024 йилда бошланиши лозим бўлган. Бироқ экспортни молиялаштириш билан боғлиқ муаммолар сабабли келишув амалга ошмай қолган.
Бу сафар компания Чехия давлат суғурта агентлиги EGAP, Европа комиссияси ва «Global Gateway» дастури кўмагида шакллантирилган янгиланган таклиф билан қайтган.
Қайд этилишича, компания Ўзбекистонга 30 та поезд етказиб беришни, келгусида эса шартнома ҳажмини 100 тагача оширишни кўзламоқда.
Компания баёнотида таъкидланишича, бош директор Петр Новотни ўтган бир йил давомида Ўзбекистонга бир неча бор ташриф буюриб, музокараларда шахсан иштирок этган.
«Икки йиллик музокаралардан сўнг биз Европа Иттифоқи ва Чехия кўмагини уйғунлаштириб, Ўзбекистон ҳукуматига яхлит ва ҳар томонлама пишиқ таклиф тақдим этишга эришдик. Шунинг эвазига ушбу ечим ҳозирда ниҳоятда ҳаётийдир», — деган Новот.
Ўзбекистон — Škoda Group учун стратегик бозор
Баёнотда, шунингдек, ҳозирги вақтда Ўзбекистон «Škoda Group» учун Европадан ташқаридаги асосий стратегик йўналиш экани ва агар компания мамлакат бозорида муваффақият қозонса, бутун Марказий Осиё минтақаси учун хизмат қилувчи йирик хаб ташкил этишни режалаштираётгани маълум қилинган.
