Ўтган йилдан 40 фоизга арзонлаган биткоин: бу ишонч инқирозими?

Дам олиш кунлари ликвидлик паст бўлган шароитда биткоин нархи 76 минг доллардан пастга тушиб кетди – бу 2025 йил апрелидан бери биринчи бор кузатилди. Дунёдаги энг йирик криптовалюта қиймати ўтган йилги чўққиси — 126 минг доллардан юқори даражадан қарийб 40 фоизга пасайган. Бу ҳақда «Bloomberg» хабар берди.

Январ ойини биткоин қарийб 11% минус билан якунлади. Криптовалюта тўрт ой кетма-кет арзонламоқда – бундай узоқ давом этган пасайиш 2018 йилдан бери кузатилмаган.

«Bloomberg»нинг ёзишича, жорий сотув тўлқини ўзига хос: у саросима билан эмас, балки харидорлар, импулс ва ишонч етишмаслиги билан боғлиқ. Агентликка кўра, октябрдаги кескин қулашдан фарқли ўлароқ, биткоиннинг ҳозирги пасайиши учун аниқ триггер позицияларнинг занжирли ликвидацияси ёки тизимли шок бўлмаган.

Биткоин геосиёсий кескинликка ҳам, доллар заифлашувига ҳам, рискли активлар раллисига ҳам деярли реакция қилмади. Охирги ҳафталарда олтин ва кумуш нархлари кескин тебранганига қарамай, криптовалюталарда ҳеч қандай ротация кузатилмади.

Яна бир эътиборли жиҳат – ижтимоий тармоқларда биткоинга нисбатан оптимизмнинг деярли йўқлиги. «Bloomberg» ёзишича, бу гал пасайиш одатдагидек қўллаб-қувватловчи изоҳлар ва «пасайишда сотиб олиш»га чақириқларсиз қарши олинди. Мақолада қайд этилишича, Доналд Трамп маъмурияти томонидан билдирилган қўллаб-қувватлаш ва институционал инвестициялар ўсиши ҳам бозорга ёрдам бермаяпти. Кўп инвесторлар Трампнинг ҳокимиятга келиши билан боғлиқ оптимизм аввалданоқ нархларда инобатга олинган, деб ҳисоблайди.

Оммавий инвесторлар томонидан ишончнинг пасайганини биткоин бўйича спот-ETFлардаги чиқимлар ҳам кўрсатмоқда. Захираларини криптовалютага ўтказишга қарор қилган компаниялар каби йирик ўйинчилар ҳам харидларни қисқартирган. «Kaiko» маълумотларига кўра, ҳозир биткоин бозорининг «чуқурлиги» – яъни йирик битимларни нархга жиддий таъсир қилмасдан ўзлаштириш қобилияти – октябрдаги чўққидан 30 фоиздан кўпроқ паст. Ликвидлик охирги бор 2022 йилда FTX криптобиржаси қулаганидан кейин бундай даражага тушган эди.

Таҳлилчилар нима дейди?

«Kaiko» таҳлилчиси Лауренс Фрауссеннинг сўзларига кўра, бозорнинг сезиларли тиклана бошланиши учун олти ойдан тўққиз ойгача вақт керак бўлиши мумкин.

«Мен биткоин 2026 йилда янги тарихий максимумни кўрсатади, деб ўйламайман», – деди маркет-мейкер «Wincent» компанияси директори Пол Ховард.

«Ferro BTC Volatility Fund» жамғармаси асосчиси Ричард Хожес эса йирик биткоин эгалари сабр қилишлари керак, демоқда .

«Мен кўплаб биткоин “китлари” билан мулоқот қиламан ва уларга очиқчасига айтаман: яқин минг кун ичида янги тарихий максимумни кўрмайсизлар», – деди Хожес.

«Bloomberg» эслатишича, биткоинга 2021 йилдаги энг паст кўрсаткичдан (ўшанда нарх қарийб 69 минг долларга етган эди) кейин тикланиш учун 28 ой керак бўлган. 2017 йилдаги «ICO» бумидан кейин эса деярли уч йил. Шу мезонлардан келиб чиқиб, агентлик хулосасига кўра, жорий пасайиш ҳали эрта босқичда бўлиши мумкин.