«SpaceX» Украина илтимосига кўра, «Starlink» интернетини Россия дронлари учун ёпди

Украина сўровига биноан «SpaceX» компанияси Россия қўшинлари томонидан «Starlink» сунъий йўлдош интернетидан фойдаланишни чеклади. Бу алоқа зарбали дронларни бошқариш ва Украина фуқаролик инфратузилмасига ҳужумларда қўлланаётгани қайд этилган.

«SpaceX» асосчиси Илон Маск ижтимоий тармоқда Украина мудофаа вазири Михаил Фёдоров мурожаатига жавобан, «Starlink»дан рухсатсиз фойдаланишни тўхтатиш бўйича кўрилган чоралар самара берганини маълум қилди. Унинг сўзларига кўра, Россия томонининг сунъий йўлдош алоқасидан фойдаланиш имкониятлари сезиларли даражада чекланган.

Михаил Фёдоров ҳам чоралар амалда натижа бераётганини тасдиқлаб, «SpaceX» билан ҳамкорлик давом этишини билдирди. У кейинги босқичда янада кенг қамровли техник ечимлар ишлаб чиқилаётганини таъкидлади.

Техник механизм

Маълумотларга кўра, чекловлар тўлиқ ўчириш эмас, балки техник параметрларни ўзгартириш орқали амалга оширилган. Хусусан, зарбали дронларда қўлланаётган «Starlink» терминаллари учун максимал уланиш тезлиги 75 km/h билан чекланган.

Россия дронларининг парвоз тезлиги 180–270 km/hʼни ташкил этгани сабабли, ушбу чеклов алоқа барқарор ишлашини амалда имконсиз қилиб қўяди. Натижада «Starlink» орқали дронларни масофадан бошқариш самарасини йўқотади.

Украина мудофаа вазирлигидаги технологик масалалар бўйича маслаҳатчи Сергей Бескрестновнинг айтишича, жорий этилган қарор вақтинчалик характерга эга. Унинг сўзларига кўра, янада мустаҳкам ва универсал ечимлар ишлаб чиқиш қўшимча вақт ва мувофиқлаштиришни талаб қилади.

Муаммо фонидаги қарор

Муаммо 2026 йил январ ойи охирида кескинлашди. «Урушни ўрганиш институти» ҳамда Украина ҳарбийлари Россия қўшинлари зарбали дронларига «Starlink» терминаллари ўрнатилаётгани ҳақида маълум қилган эди. Бу дронлар ҳаво мудофааси тизимларини четлаб ўтишда қўлланаётгани қайд этилган.

23 январ куни Михаил Фёдоров Украина рақамли технологиялар идоралари «SpaceX» билан зудлик билан алоқа ўрнатганини маълум қилди. Орадан икки кун ўтиб, биринчи техник қарши чоралар жорий этилгани эълон қилинди.

Экспертларнинг фикрича, мазкур қарор сунъий йўлдош инфратузилмасининг ҳарбий можароларда қўлланилиши масаласини янада кескин кун тартибига олиб чиқмоқда. Келгусида «Starlink»дан фойдаланиш қоидалари халқаро даражада қайта кўриб чиқилиши мумкин.