Трамп сайловда республикачилар Конгрессни бой беришини истисно этмади

АҚШ президенти Доналд Трамп 2026 йилги оралиқ сайловлар якунлари бўйича Республикачилар партияси Конгресс устидан назоратни йўқотиш хавфи борлигини тан олди. У бу ҳақда WABC радиостанциясига берган интервюсида айтиб ўтган.

«Статистикага кўра, президент сайловда ғалаба қозонганидан кейин, республикачилар кўпинча оралиқ сайловларда мағлуб бўлади», — деди Трамп.

Ушбу баёнот амалдаги президентнинг ўз партияси учун сиёсий рискларни очиқ эътироф этиши сифатида баҳоланмоқда.

Айни пайтда республикачилар Конгресснинг ҳар икки палатасида кўпчиликни сақлаб турибди. Сенатда партия 53 ўринга, Қонунчилик палатасида эса 218 ўринга эга. Бироқ оралиқ сайловлар анъанавий равишда ҳокимиятдаги партия учун энг мураккаб сиёсий синовлардан бири ҳисобланади.

Сиёсий фон

2026 йил 3 ноябр куни ўтадиган оралиқ сайловлар Доналд Трампнинг иккинчи президентлик муддати ўртасида ўтказилади ва АҚШнинг 120-Конгресси таркибини белгилаб беради. Тарихий жиҳатдан, президент партияси бундай сайловларда кўпинча ўринларини йўқотиб келган.

Ўтган ҳафта «The Wall Street Journal» нашри ўз манбаларига таяниб ёзишича, миллиардер Илон Маск АҚШ сиёсий ҳаётига янада фаол қизиқиш билдирмоқда. Нашрга кўра, у кузда бўладиган оралиқ сайловлар олдидан республикачилар партиясини қўллаб-қувватлаш имкониятларини кўриб чиқмоқда.

Маскнинг сиёсий жараёнлардаги иштироки партия учун қўшимча ресурс ва таъсир манбаи сифатида қаралмоқда. Бироқ бу омил сайлов натижаларини тўлиқ кафолатлаб бермаслиги ҳам таъкидланмоқда.

Сайловлар олдидан

АҚШ сиёсий муҳитида рақобат кучайиб бораётгани кузатилмоқда. Аввалроқ айрим таҳлилчилар Калифорния губернаторининг президентлик пойгасида Жей Ди Вэнсни ортда қолдириш эҳтимоли ошганини қайд этган эди. Бу эса демократлар лагерининг ҳам фаоллашиб бораётганидан дарак беради.

Трампнинг баёноти республикачилар орасида эҳтиёткорлик кайфиятини кучайтириши мумкин. Оралиқ сайловлар нафақат қонунчилик ташаббуслари, балки президентнинг қолган муддатдаги сиёсий манёври учун ҳам ҳал қилувчи аҳамиятга эга бўлади.