Йил криптоможароси: АҚШ давлат ҳамёнлари талон-торож қилинди
Ўсмир ҳакер мақтанчоқлиги ортидан АҚШ ҳукуматининг криптоактивларидан ўнлаб миллион доллар йўқолганини ошкор қилиб қўйди.
2025–2026 йиллар чегарасида блокчейн жамоатчилигини ларзага солган воқеа юз берди. АҚШ ҳукуматига тегишли криптоҳамёнлардан 40 млндан 90 млн долларгача маблағ ноқонуний олиб чиқилгани аниқланди. Манбаларга кўра, бу маблағлар ўсмир Жон Дагита томонидан ўзлаштирилган.
Фош этилиш мураккаб махсус операция натижаси эмас, балки Telegramдаги оддий баҳс орқали юз берган. «Lick» тахаллуси билан танилган ўсмир бошқа кибержиноятчи билан «band for band» — ким бойроқ эканини кўрсатиш мусобақасини ўтказган.
Баҳс давомида у ўзининг «Exodus» ҳамёни экранини очиқ намойиш қилиб, миллионлаб доллар сақланаётган манзилларни кўрсатган. Бу эса воқеалар занжирини тезлаштирган.
Давлат шартномаси ва оилавий омил
Блокчейн-таҳлилчи ZachXBT ушбу ҳамёнлар ҳаракатини кузатиб, маблағлар тўғридан тўғри АҚШ ҳукуматига тегишли, мусодара қилинган криптоактивлар сақланадиган ҳамёнлардан чиққанини аниқлади. Улар «Bitfinex» билан боғлиқ активлар сифатида қайд этилган.
Жон Дагитанинг отаси раҳбарлик қилган CMDSS компанияси АҚШ маршаллар хизмати билан мусодара қилинган криптовалюталарни бошқариш бўйича шартномага эга бўлган. Айни шу инфратузилма орқали ўсмир давлат активларига кириш имкониятига эга бўлгани тахмин қилинмоқда.
Илгариёқ CMDSS лицензия масаласида танқидга учраган, аммо шартнома бекор қилинмаган. Жанжалдан сўнг компания сайти ва ижтимоий тармоқдаги саҳифалари ўчирилди, раҳбар эса оммавий майдондан ғойиб бўлди.
Оқибатлар ва саволлар
Ончейн маълумотларга кўра, операциялар 2024 йил ноябридан 2025 йил декабригача давом этган. Айрим ойларда бир марталик ўтказмалар 20 млн доллардан ошган. 2026 йил бошида ҳам шубҳали транзакциялар қайд этилган.
Ҳодиса АҚШ давлат криптоактивларини сақлаш тизимида жиддий хавфсизлик бўшлиқлари мавжудлигини кўрсатди. Текширувлар бошланган, асосий савол эса очиқ: бу тизим бузилиши бўлганми ёки кириш инсон омили орқали амалга ошганми?
Мутахассислар ушбу ҳолат давлат даражасида криптоактивлар билан ишлаш қоидаларини қайта кўриб чиқишга мажбур қилиши мумкинлигини таъкидламоқда.
