Путин ва Трампнинг одамлари АҚШда учрашди

АҚШ расмийлари Россия Федерацияси президентининг хорижий давлатлар билан инвестиция-иқтисодий ҳамкорлик бўйича махсус вакили Кирилл Дмитриев билан “самарали ва конструктив” музокаралар ўтказди. Бу ҳақда кеча, 31 январ куни АҚШ президентининг махсус вакили Стив Уиткофф маълум қилди.

Унинг сўзларига кўра, учрашув Россиянинг Украинага қарши урушига барҳам беришга қаратилган АҚШнинг воситачилик саъй-ҳаракатлари доирасида Флоридада бўлиб ўтган.

“Биз ушбу учрашувдан руҳландик – у Россиянинг Украинада тинчликни таъминлаш устида ишлаётганини кўрсатади. Барқарор ва узоқ муддатли тинчликни излашда муҳим рол ўйнаётгани учун президент Трампдан миннатдормиз”, – деб ёзди Уиткофф X ижтимоий тармоғида.

У, шунингдек, Америка делегацияси таркибига ўзи билан бирга молия вазири Скотт Бессент, АҚШ президентининг куёви Жаред Кушнер ва Оқ уйнинг катта маслаҳатчиси Жош Грюнбаум кирганини қўшимча қилди.

Америкаликлар делегацияси билан бўлган “конструктив учрашув” ҳақида Кирилл Дмитриев ҳам баёнот берди. У X тармоғида 31 январ куни Флоридада бўлиб ўтган музокараларда Украина масаласидаги тартибга солиш, шунингдек, Россия билан АҚШ ўртасидаги иқтисодий ҳамкорлик мавзуси муҳокама қилинганини маълум қилди.

Абу-Дабидаги Россия ва Украина музокаралари

Дмитриевнинг АҚШга ташрифи Москва ва Киев ўртасида Абу-Дабида ўтказилиши режалаштирилган навбатдаги музокаралар раунди арафасида бўлмоқда. Ушбу учрашув 1 февралга белгиланган. АҚШ 23-24 январ кунлари БАА пойтахтида бўлиб ўтган аввалги раундда иштирок этган. АҚШ давлат котиби Марко Рубио иккинчи раунд икки томонлама бўлишини айтган, бироқ Вашингтон ҳам унда иштирок этиши мумкинлигини инкор этмаган.

Россия президенти матбуот котиби Дмитрий Песков 30 январ куни АҚШ президенти Доналд Трамп Владимир Путиндан Киевга зарбалар беришдан “музокаралар учун қулай шароит яратиш мақсадида” тийилиб туришни сўраганини тасдиқлади. Бироқ Песковнинг таъкидлашича, гап фақат 1 февралгача бўлган муддат ҳақида кетган. Трамп эса 29 январ куни Путин яқинги етти кун давомида Украина шаҳарларини ўққа тутишни тўхтатишга рози бўлганини айтган эди.

Шу билан бирга, Украина президенти Владимир Зеленский аввалроқ АҚШ ва Эрон ўртасидаги таранглик кучайиши сабаб Украина, Россия ва АҚШ делегациялари ўртасидаги навбатдаги учрашув санаси ва жойи ўзгариши мумкинлигини истисно этмаган эди. 31 январ куни кечқурунги мурожаатида Зеленский Украина АҚШ томонидан кейинги учрашувлар бўйича аниқлик кутаётганини билдирди.

“Украина барча ишчи форматларда ишлашга тайёр. Натижалар бўлиши ва учрашувлар ўтиши муҳим. Келаси ҳафта учрашувлар бўлишини кутяпмиз, уларга тайёргарлик кўряпмиз”, – деди Украина давлати раҳбари.