Си Жинпинг юанни глобал захира валютага олиб чиқишга чақирди
Хитой раҳбари юанни халқаро савдо ва молияда фаол қўлланадиган кучли валютага айлантириш зарурлигини таъкидлади.
Хитой Халқ Республикаси раиси Си Жинпинг юанга жаҳон захира валюта мақомини бериш ғоясини илгари сурди. Унинг таъкидлашича, мамлакат халқаро савдо, инвестиция ва валюта бозорларида кенг қўлланиладиган барқарор ва ишончли пул бирлигини шакллантириши керак. Бу ҳақда Financial Times нашри хабар берди.
Си Жинпинг партиянинг «Қиуши» журналида эълон қилинган мақоласида Хитойнинг узоқ муддатли мақсади кучли валюта орқали глобал иқтисодий жараёнларда таъсирини ошириш эканини қайд этган. Унинг сўзларига кўра, бундай мақсадга эришиш учун самарали пул-кредит сиёсатини юритувчи кучли марказий банк ҳамда халқаро капитални жалб қила оладиган рақобатбардош молиявий институтлар зарур.
Хитой раҳбарининг баёноти жаҳон бозорларида ноаниқлик кучайиб бораётган бир пайтда янграмоқда. АҚШ долларининг нисбий заифлашуви, Федерал захира тизими раҳбариятида эҳтимолий ўзгаришлар, шунингдек геосиёсий ва савдо зиддиятлари марказий банкларни доллар активларига бўлган муносабатни қайта кўриб чиқишга ундамоқда.
Пекиннинг асосий мақсади
The Asia Group таҳлил марказининг Хитой бўйича директори Хан Шен Лин фикрича, Пекин доллар ўрнини тўлиқ эгаллашни эмас, балки юанни АҚШ таъсирини чекловчи стратегик мувозанат воситаси сифатида кўрмоқда. 2022-йилда Россиянинг Украинага бостириб киришидан кейин юан жаҳон савдосини молиялаштиришда иккинчи йирик валютага айланган, аммо унинг расмий захиралардаги ўрни ҳали ҳам чекланган.
Халқаро валюта жамғармаси маълумотларига кўра, 2025-йилнинг учинчи чорагида доллар жаҳон захираларининг тахминан 57 фоизини ташкил этган. Евро улуши 20 фоиз атрофида бўлган, юан эса атиги 1,93 фоиз билан олтинчи ўринда қолмоқда.
