Клинтонлар Эпштейн иши бўйича кўрсатма беришга рози бўлди

АҚШнинг собиқ президенти Билл Клинтон ва унинг рафиқаси, собиқ давлат котиби Ҳиллари Клинтон Конгрессда Жеффри Эпштейн иши бўйича кўрсатма беришга розилик берди. Бу ҳақда бир-биридан мустақил равишда «CNN» телеканали ва «The New York Times» газетаси кеча, 2 феврал куни кечқурун хабар берди.

Қайд этилишича, Клинтонлар узоқ вақт давомида бунга рози бўлмаган ва Вакиллар палатаси уларни судга келмаслик учун жиноий жавобгарликка тортиш масаласини овозга қўйиши арафасидагина бу қадамни ташлаган. Конгрессда кўрсатма беришни, хусусан, Вакиллар палатасининг Назорат ва ҳукумат ислоҳоти қўмитаси раиси, республикачи Жеймс Комер талаб қилган. Унинг талабларини Демократик партиянинг қатор вакиллари ҳам қўллаб-қувватлаган.

«The New York Times» таъкидлашича, «бу қўмита раиси бўлган республикачи учун ютуқ бўлди: у Эпштейн иши бўйича ўзи олиб бораётган терговда эътиборни АҚШ президенти Доналд Трампнинг Эпштейн билан алоқалари ва унинг маъмурияти бу ишни қандай олиб бораётганидан бир пайтлар шарманда бўлган молиячи ва унинг ёрдамчиси Гислейн Максвелл билан боғлиқ бўлган машҳур демократларга қаратмоқчи».

Клинтонлар эса аввалроқ Эпштейн иши бўйича ўзларида мавжуд бўлган чекланган маълумотларни аллақачон тақдим этганини билдириб, Конгрессда кўрсатма бериш талаби сиёсий сабабларга эга эканини айтган эди.

Билл Клинтоннинг Жеффри Эпштейн билан танишлиги

Америкалик молиячи Жеффри Эпштейн 2019 йил июл ойида вояга етмаганларни фоҳишаликка мажбурлашда айбланиб, ҳибсга олинган ва ўша йил август ойида қамоқхона камерасида осилган ҳолда топилган.

Билл Клинтон Эпштейнни танишини инкор этмайди, бироқ унинг жиноятлари ҳақида ҳеч нарса билмаганини, ҳеч қачон Эпштейннинг хусусий оролига бормаганини ва тахминан 20 йил аввал у билан алоқаларни узганини таъкидлайди. Парвоз ҳужжатлари эса 2002–2003 йилларда Клинтон Эпштейннинг хусусий самолётида тўрт марта халқаро парвоз қилганини тасдиқлайди.

Шунингдек, Клинтон ва Эпштейннинг бирга тушган суратлари ҳам мавжуд, аммо улар 1990 йиллар охири – 2000 йиллар бошига тааллуқли бўлиб, ўша пайтда молиячининг жиноятлари жамоатчиликка ҳали маълум эмас эди.

Аввалроқ эълон қилинган Эпштейн иши бўйича материаллар бир қатор машҳур шахслар, жумладан, Британия шаҳзодаси Эндрю билан боғлиқ алоқаларни ҳам очиб берган. Бу иш оқибатида у қироллик унвонидан маҳрум этилган.

АҚШ Адлия вазирлиги томонидан 30 январ куни вояга етмаганларни жинсий эксплуатация қилишда айбланган молиячи Жеффри Эпштейн ишига доир 3 миллиондан ортиқ ҳужжатни очиқлади. Ушбу улкан тўпламда сиёсатчилар, бизнесменлар, Ҳолливуд юлдузлари ва оддий фуқароларнинг исмлари тилга олинади. Ҳужжатларда Марказий Осиё, хусусан Ўзбекистон билан боғлиқ бир қатор ёзишмалар ҳам мавжуд.