«SpaceX» IPO’да 1,5 трлн долларга баҳоланиши мумкин
Илон Маскка тегишли «SpaceX» компанияси тарихдаги энг йирик IPO бўлиши мумкин бўлган жамоатчиликка чиқишни кўриб чиқмоқда.
«SpaceX» 2026 йилнинг июн ойи ўрталарида бирламчи оммавий акциялар жойлаштиришни ўтказиш имкониятини баҳоламоқда. «Financial Times» нашри манбаларга таяниб хабар беришича, компания IPO орқали 50 млрд долларгача маблағ жалб этишни ва ўз қийматини тахминан 1,5 трлн доллар даражасида белгилашни мақсад қилган.
Энг йирик IPO бўлиши кутилмоқда
Агар ушбу режа амалга ошса, «SpaceX»нинг баҳоланиши тарихдаги энг катта IPO’га айланиши мумкин. Бу кўрсаткич 2019 йилда 29 млрд доллар жалб қилган «Saudi Aramco» IPO’сидан икки баробар юқори бўлади. «Saudi Aramco»нинг IPO’си компанияга 1,7 трлн доллар бозор капитализациясини таъминлаган ва ҳозиргача 1 трлн доллардан юқори баҳоланган ягона тўлиқ якунланган битим ҳисобланади.
Ички музокаралар ва позициянинг ўзгариши
Маълумотларга кўра, «SpaceX» молия директори Брет Жонсен 2024 йил декабридан бери мавжуд хусусий инвесторлар билан учрашувлар ва «Zoom» орқали музокаралар ўтказиб, 2026 йилда IPO ўтказиш имкониятларини муҳокама қилган. Аввал Илон Маск «SpaceX»ни хусусий компания сифатида сақлаш тарафдори бўлган, бироқ компания қийматининг кескин ўсиши ва «Starlink» спутник интернет хизмати муваффақияти стратегия қайта кўриб чиқилишига туртки берган.
Уолл-стрит ва бозор кутилмалари
«Reuters» аввалроқ берган хабарга кўра, «SpaceX» бозорга чиқиш жараёнида етакчи ролни бажариш учун тўртта Уолл-стрит банкини жалб қилишни режалаштирмоқда. Шу билан бирга, жаҳон молия бозорлари 2026 йилни АҚШдаги йирик IPO’лар йили бўлиши мумкин, дея баҳоламоқда. Бу жараёнда сунъий интеллект соҳасидаги «Anthropic» ва «OpenAI» ҳам эҳтимолий IPO учун дастлабки тайёргарлик ишларини олиб бораётгани айтилмоқда.
Бозор фонидаги омиллар
АҚШ акциялар бозорида капитал жалб қилиш фаоллиги 2025 йилда сўнгги уч йиллик пассивликдан сўнг қайта тиклана бошлади. Таҳлилчиларга кўра, геосиёсий кескинлик ва ўзгарувчанликка қарамай, космик технологиялар соҳаси юқори ўсиш салоҳияти сабаб инвесторлар учун истиқболли йўналиш бўлиб қолмоқда.
Аввалроқ 2026 йилда аэрокосмик компания «SpaceX» ҳамда оммабоп чат-ботлар ишлаб чиқувчи иккита компания — «OpenAI» ва «Anthropic» биржага чиқишга тайёргарлик кўраётгани ҳақида хабар бергандик.
