«СИ мендан хафа бўлиб қолгандир». Валуев таҳдидли видеоси «фейк» эканини айтди

Бокс бўйича собиқ жаҳон чемпиони, Россия Давлат думаси депутати Николай Валуев ўзининг собиқ СССР давлатларига таҳдид қилгани акс этган видео «фейк» эканини маълум қилди. Бу ҳақда «РИА Новости» хабар берди.

«Бу видео менга умуман алоқадор эмас. Технологиялар шунчалик тез ривожланаётгани қувонарли, аммо бу сунъий интеллект ёрдамида қилинган. Мен тез-тез сунъий интеллект ва шундай сохта видеолар яратилиши мавзусини кўтариб келаман. Эҳтимол, сунъий интеллект мендан хафа бўлиб қолгандир», – деди Валуев дипфейк пайдо бўлишини изоҳлар экан.

«Валуев» нима деганди?

Ижтимоий тармоқларда тарқалган видеода «Валуев» Путинга яқинлиги билан танилган файласуф Александр Дугин ғояларини қўллаб-қувватлаб, Украинада амалга оширилаётган «махсус ҳарбий операция»лар собиқ совет республикаларида ҳам ўтказилиши кераклигини айтганди.

«Буюк файласуф Дугин ҳақ. Биз 30 йил давомида постсовет республикаларига «ширинликлар» улашдик, лекин бу ёрдам бермади. Энди қамчи керак бўлади. Шунинг учун ёшларни тайёрламоқдамиз. Зумерларга спорт залига боришни ва эркакларга хос спорт турлари билан шуғулланишни маслаҳат бераман», — деганди «Валуев».

Ўзбекистонлик машҳур боксчи Руслан Чагаев эса бу видео сунъий интеллект бўлиши мумкинлигини тахмин қилган ва бундай бўлмаган тақдирда «унга ўша пайтда теккан зарбаларим энди таъсир қилаётгани»ни айтганди.

«Валуевнинг калласини жойига қўйиш учун битта жанг керак бўлса, мен тайёрман. Бу сафар, Худо хоҳласа, жангдан кейин у бутун Марказий Осиёни яхши кўради ва бунақа бемаза гаплар гапирмайди», — деганди Руслан Чагаев.

Сунъий интеллект бўлмаганлари ҳам кўп

Аввалроқ, «Рус дунёси» ғоясининг асосий мафкурачиси, файласуф Александр Дугин Марказий Осиё ва бошқа собиқ СССР ҳудудларининг суверенитетини инкор этиб, Россия уларни ўз назорати остига олиши кераклигини айтган эди. Унинг фикрича, акс ҳолда бу ҳудудлар Ғарб давлатлари учун геосиёсий таянч нуқтага айланади.

Ундан олдинроқ эса россиялик пропагандачи Владимир Соловёв ҳам Марказий Осиё ва Арманистонни Россия миллий хавфсизлиги учун муҳим ҳудудлар сифатида таърифлаб, бу минтақаларда ҳам ҳарбий амалиётлар ўтказиш кераклигини айтган. У халқаро ҳуқуқ меъёрларини очиқчасига иккинчи даражага суриш кераклигини таъкидлаган.

Пропагандачининг ушбу фикрларига Россия Ташқи ишлар вазирлиги матбуот котиби Мария Захарова муносабат билдириб, Соловёв бу гапларни ўзининг шахсий «Соловёв Лайф» каналида билдирганини, шу боис уларни давлат нуқтаи назари деб баҳолаш нотўғри эканини қайд этди.

Лекин Марказий Осиёга нисбатан таҳдиднинг Россия давлат телевидениесидан янграши ҳам узоқ куттиргани йўқ. 27 январ куни «Россия 1» телеканали эфирида Владимир Соловёв бошловчилигидаги «Вечер с Владимиром Соловёвим» дастурида иштирок этган сиёсатшунос Сергей Михеев минтақа давлатларининг ташқи сиёсат йўналишини танқид қилиб, улар билан муносабатларда тенг ҳуқуқли шериклик тамойилини амалда рад этди.

Михеевнинг айтишича, Россия йиллар давомида Марказий Осиё давлатларини ҳар томонлама қўллаб-қувватлаб келган, бироқ бу ҳолат ушбу мамлакатларнинг «эркаланиб кетиши»га олиб келган.