Венесуэла нефт секторини хусусий инвесторлар учун очди

Венесуэла парламенти АҚШ талабларига мувофиқ нефть секторини хусусий инвесторлар учун очиш тўғрисидаги қонунни қабул қилди. Венесуэла президенти вазифасини бажарувчи Делси Родригес 29 январ куни ислоҳотни «тарихий сакраш» деб атади.

Бунгача мамлакат нефт секторида фақат «PDVSA» давлат нефт компанияси билан боғлиқ қўшма корхоналар фаолият юрита оларди, бунда «PDVSA» ҳар доим назорат пакетига эга бўлиб қолар эди.

Эндиликда хусусий компаниялар «PDVSA» билан қўшма корхона тузишга ҳожат қолмасдан, мустақил равишда нефт қазиб олиши ва сотиши мумкин. Нефт қазиб олиш учун ягона 15 фоизлик бадал ва ялпи даромаднинг 30 фоизигача бўлган энг юқори лицензия йиғими жорий этилмоқда. Солиқ ставкалари аниқ лойиҳанинг рентабеллиги ва инвестиция ҳажмига қараб белгиланади.

Шу фонда АҚШ Венесуэла нефт саноатига нисбатан санкцияларни юмшатди. АҚШ Молия вазирлиги Каракасдаги ҳукумат ва «PDVSA» давлат нефт компанияси билан битимлар ўтказиш учун умумий рухсатнома берди. Рухсат Венесуэла нефтини сотиш, ташиш ва қайта ишлашни қамраб олади.

Венесуэла нефтини АҚШ назорати остида сотиш

Венесуэла нефти сотувининг қайта тикланиши АҚШнинг ҳарбий операциясидан сўнг амалга ошди – январ ойи бошида ушбу операция давомида Венесуэланинг собиқ раҳбари Николас Мадуро қўлга олинган эди.

Америка назорати остида экспорт қайта бошланганидан сўнг, манбаларга кўра, «PDVSA» давлат компанияси нефт қазиб олиш ҳажмларини ошира бошлаган.

АҚШ Каракас билан тузилган янги келишув доирасида Венесуэла нефтини сотишни аллақачон бошлаган. Илк битимлардан тушган тахминан 500 миллион долларлик даромад АҚШ маъмурияти назоратидаги банк ҳисобларига жойлаштирилмоқда. Келишувнинг умумий ҳажми 2 миллиард долларга баҳоланмоқда, асосий ҳисоб эса ҳисоб-китоблар учун нейтрал майдон сифатида Қатарда очилган.

Эслатиб ўтамиз, Венесуэланинг вақтинча президенти Делси Родригес 25 январ куни Вашингтон буйруқларидан «етарли даражада тўйганини» айтганди.