Яшнободдаги ёнғинда бир киши ҳалок бўлди
Аввалроқ Тошкентдаги «Авиатор Корзинка» биносида ёнғин содир бўлганлиги ҳақида хабар берган эдик.
© Фото: Kun.uz 31 январь куни соат 15:47 да Тошкент шаҳри Яшнобод тумани, Паркент кўчасида жойлашган «Авиатор Корзинка» савдо мажмуасида ёнғин содир бўлган эди. Маълумотларга кўра, ёнғин 16:50 да қуршаб олиниб, соат 17:17 да тўлиқ бартараф этилган.
Фавқулодда вазиятлар вазирлигининг маълум қилишича, ёнғиндан сўнг олиб борилган дастлабки ўрганиш ишларида вайроналар остида бир нафар фуқаронинг жасади топилган. Ҳозирча ҳалок бўлган шахснинг ёши ва жинси ҳақида маълумот берилмаган.
Шунингдек, ёнғин бўйича «Корзинка» расмий баёнот билан чиқди. Қайд этилишича, ёнғин ўчоғи бинолар мажмуасининг иккинчи қаватида, бошқа ижарачилар фаолият юритаётган ҳудудда аниқланган.
Баёнотда таъкидланишича, «Авиатор» савдо марказининг биринчи қаватида жойлашган «Корзинка» супермаркети мазкур бинода ижара асосида иш юритади ва объект компания мулки ҳисобланмайди. Шунингдек, ёнғин «Корзинка» дўкони ҳудудидан ташқарида келиб чиққан бўлиб, супермаркет фаолияти билан боғлиқ эмас.
Компания маълумотларига кўра, ёнғин аниқланган заҳотиёқ барча белгиланган хавфсизлик чоралари амалга оширилган. Мижозлар ҳамда дўкон ходимлари қисқа вақт ичида хавфсиз ҳудудга эвакуация қилинган. Ҳодиса оқибатида «Корзинка» супермаркети ходимлари ёки мижозлари орасида жабрланганлар қайд этилмаган.
Воқеа жойига тезкор равишда ёнғин-қутқарув хизматлари етиб келган. Ёндириш ўчоғи назоратга олинган ва ҳозирда мутахассислар томонидан зарур техник ҳамда текширув ишлари олиб борилмоқда. Ёнғин келиб чиқиш сабабларини аниқлаш бўйича тегишли экспертизалар ўтказилмоқда.
«Корзинка» компанияси фавқулодда вазиятлар хизматлари ва мутасадди идоралар билан доимий алоқада эканини билдирган.
