Урушлар, тарифлар ва инфляция: миллиардерларни 2026 йилда нима кўпроқ қўрқитяпти?
Дунёнинг энг бой одамлари иқлим ўзгариши ёки технологик узилишларга қараганда, божхона тўсиқларидан кўпроқ хавотирда.
Савдо урушлари, геосиёсий беқарорлик ва давлат сиёсатининг олдиндан айтиб бўлмаслиги 2026 йилда жаҳон иқтисодиёти учун асосий хатарлар рўйхатининг бошидан жой олди. Дунёнинг энг бой одамлари иқлим ўзгариши ёки технологик узилишларга қараганда, божхона тўсиқларидан кўпроқ хавотирда. Бу ҳақда «UBS Billionaire Survey» сўрови натижаларига таяниб, «Visual Capitalist» хабар бермоқда.
Жаҳон капитали қўрқувларининг ТОП-3 таси
Сўровга кўра, ўта бой инвесторлар кайфиятини учта асосий омил белгилаб бермоқда:
Тарифлар ва савдо чекловлари (66%) – йилнинг энг катта таҳдиди. Респондентларнинг кўпчилиги протекционизм йўлга қўйилган таъминот занжирларини издан чиқаради, деб қўрқмоқда.
Йирик геосиёсий можаролар (63%) – урушлар, минтақавий беқарорлик ва йирик давлатлар ўртасидаги қарама-қаршилик қўрқуви иқтисодий муаммоларга жуда яқин турибди.
Сиёсий ноаниқлик (59%) – миллиардерлар ўйин қоидаларининг аниқ эмаслиги ва етакчи давлатлар ҳукуматлари қарорларининг олдиндан айтиб бўлмаслигидан хавотирда.
Шунингдек, сўровда қатнашганларнинг салмоқли қисми (44%) ҳануз юқори инфляциядан ташвишланмоқда. Бу эса дунёда нархлар барқарорлиги ҳали ҳам мўрт эканини кўрсатади.
Қўрқув географияси: Осиё божлардан, Америка эса урушлардан қўрқади
Тадқиқот хатарларни қабул қилишда қизиқарли минтақавий фарқларни очиб берди:
Осиё–Тинч океани минтақаси: бу ерда миллиардерларнинг 75 фоизи тарифларни асосий муаммо деб атаган. Бу мантиқий, чунки ушбу мамлакатлар иқтисодиёти жаҳон савдосига чуқур интеграциялашган ва экспортга боғлиқ.
Шимолий ва Жанубий Америка: бу минтақада респондентларнинг 70 фоизи инфляция ва геосиёсий можароларнинг кучайишидан энг кўп қўрқмоқда.
Энг кам ташвиш солаётган омиллар
Қизиқ жиҳати шундаки, технологик издан чиқишлар (15%) ва иқлим ўзгариши (14%) каби глобал чақириқлар устуворликлар рўйхатининг энг охирида қолган. Бу йирик капитал уларни ҳозирги «шок» сиёсий ва иқтисодий таҳдидлардан фарқли равишда, узоқ муддатли ёки бошқариш мумкин бўлган муаммолар сифатида кўраётганини англатади.
