Ўзбекистон Президенти ва Покистон Бош вазири қўшма бизнес форумда иштирок этди

Исломобод шаҳрида Ўзбекистон Президенти Шавкат Мирзиёев ва Покистон Бош вазири Шаҳбоз Шариф иштирокида қўшма бизнес форуми бўлиб ўтди. Давлат ташрифининг ишбилармонлик дастури доирасида ўтказилган тадбир икки томонлама иқтисодий муносабатларда муҳим бурилиш нуқтаси сифатида баҳоланмоқда.

Форумда икки мамлакатдан 300 дан ортиқ етакчи саноат корхоналари, савдо компаниялари, тузилмалар ва бизнес уюшмалар вакиллари қатнашди. Покистон томонидан энергетика, тўқимачилик, кимё, металлургия, озиқ-овқат, логистика ва чарм саноатида фаолият юритувчи йирик компаниялар иштирок этди.

Иқтисодий ҳамкорлик

Президент Шавкат Мирзиёев ўз нутқида олий даражадаги музокаралар Ўзбекистон–Покистон муносабатларини савдо-иқтисодий ва инвестициявий жиҳатдан янги босқичга олиб чиққанини таъкидлади. Илк бор савдо ҳажмини 2 миллиард долларга етказишни назарда тутувчи иқтисодий ҳамкорлик байонномаси имзоланди.

Икки давлат мутасаддиларига комплекс «йўл харитаси» ишлаб чиқиш, муаммоларни тезкор ҳал этиш механизмларини жорий қилиш вазифаси қўйилди. Фармацевтика, тиббиёт, енгил саноат, кон-металлургия, геология ва озиқ-овқат хавфсизлиги асосий ҳамкорлик йўналишлари сифатида белгиланди.

Покистон компанияларига таклифлар

Покистон компаниялари Ўзбекистонда дори воситалари, биотехнология ва тиббий ускуналарни маҳаллийлаштириш лойиҳаларига таклиф этилди. Тошкент фармацевтика паркида инвесторлар учун махсус имтиёзлар яратилиши маълум қилинди.

Транспорт-логистика соҳасида ҳамкорликни кучайтириш савдо айланмасини оширишнинг асосий шарти сифатида қайд этилди. Покистон–Хитой–Қирғизистон–Ўзбекистон йўналиши бўйлаб юк ташиш, янги авиақатновлар ва Трансафғон темир йўли лойиҳаси муҳим ташаббуслар қаторида тилга олинди.

Форум якунида эришилган келишувлар бўйича алоҳида Байоннома имзоланди ҳамда қатор инвестициявий ва савдо-иқтисодий битимлар алмашилди.