Зеленский Путин кимдан қўрқишини айтди
Украина президентининг сўзларига кўра, Россия раҳбарини ҳайиқтирадиган ягона куч Европада эмас.
Украина Президенти Воладимир Зеленский Россия раҳбари Владимир Путин Доналд Трампдан қўрқишини, бироқ европаликлардан мутлақо қўрқмаслигини маълум қилди. Бу ҳақда Зеленский «France 2» телеканалига берган интервюсида сўз очди.
«Путин фақатгина Трампдан қўрқади — бу ҳақиқат. Трамп Путинга нима дейиши кераклиги эса менинг ишим эмас. АҚШ Президенти ушбу урушни муросалар орқали тўхтатиш ниятида. Биз бу таклифларни қўллаб-қувватладик, бироқ давлат суверенитети масаласида ҳеч қандай муроса бўлиши мумкин эмас», - деди Украина раҳбари.
«Путинни демократия билан енгиб бўлмайди»
Зеленскийнинг қўшимча қилишича, Путин «европаликлардан қўрқмайди». Унинг фикрича, «уруш қоидаларига риоя қилмайдиган Путинни демократия билан енгиб бўлмайди». Шунингдек, президент Европада келгусида юз бериши мумкин бўлган фожиалар хавфидан огоҳлантирди.
«Босим етарли эмас»
Зеленский Франция президенти Эммануэл Макрон интилаётган Владимир Путин билан мулоқотни тиклаш масаласига ҳам тўхталиб ўтди. «Путиннинг мақсади — Европани таҳқирлаш», - дея таъкидлади у ва Россия президентига бўлаётган босимнинг «етарли эмас» эканини қўшимча қилди.
Зеленскийнинг фикрича, мулоқотни фақат «муайян шартлар асосида» олиб бориш зарур.
Эслатиб ўтамиз, аввалроқ Reuters агентлиги Франция президентининг дипломатик маслаҳатчиси Эммануэл Бонн 3 феврал куни россиялик мулозимлар билан музокаралар ўтказиш учун Москвада бўлгани ҳақида хабар берган эди. Агентлик манбаларига кўра, Бонн Кремлда расмий шахслар билан учрашган. У учрашув тафсилотларини очиқламаган бўлса-да, сафардан кўзланган асосий мақсад — энг аввало, Украина масаласи ҳамда бошқа муҳим мавзуларни муҳокама қилиш бўлганини қайд этган. Дипломатик манбаларнинг билдиришича, иттифоқчилар ушбу ташаббус ҳақида олдиндан хабардор қилинган.
